KALIBO, Aklan—Nagnaba eon makaron ro lebel it tubi sa Aklan River.
Raya hay kasunod it nailistang pagtaas sa lebel it tubi nga nag-abot sa 4.3 meters kahapon.
Suno kay Mr. Terence June Toriano it Municipal Disaster Risk Reduction and Management Council ukon MDRRMO-Kalibo, sa makaron hay nagnaba eon sa 3.6 meters ro lebel it tubi apang sigidas pa gihapon ro andang ginapatigayun nga monitoring.
Suno kana, indi dapat maging kampante ro mga pumueoyo eabi eon ro mga pamilyang naka-istar sa mga baeahaon nga lugar ukon maeapit sa suba.
Ginabantayan man sigon nanda ro high tide kung siin magataas it hasta 2.2 meters ro lebel it tubi bandang alas-9 makaron nga gabi-i ag sa adlaw it Lunes ginaeauman nga maga-abot raya sa 2.4 meters.
Ginapahayag nga masyadong mataas makaron ro high tide.
Samtang, sa Enero 15 ukon 16 hay magapanaog eon sigon raya 2.3 meters.
Padayun man ro pagpadumdum kara sa mga pumueoyo nga maging preparado ag maging mapagmatyag.
