Apisar nga maeayo pa man ro pagtapos it kontrata ni LeBron James, timprano paeang hay gin-istorya eon imaw it mga top executives it Los Angeles Lakers.
Apang gilayon man nga ginklaru ni Rich Paul, CEO it Klutch Sports Group nga owa pa sigon it nabilog nga deal sa tunga it magkaiba nga team.
Una eon nga nakipagpueong sanday James ag Paul kanday Lakers vice president of basketball operations ag general manager Rob Pelinka kamana man ro bag-ong Lakers coach nga si Darvin Ham sa war room it Lakers’ practice facility nga sa El Segundo, California.
Ginasugid nga si James hay sa ulihing dag-on eon lang it anang kontrata nga nagahaega it $44.5 million.
Sa makaron, sandig sa polisiya it NBA ,eligible eon man si LeBron nga pumirma it daywang bag-ong dag-on nga kontrata sa haegang $97.1 million contract.
