Nagpatigayon it legislative inquiry ro mga natungdan nga komitiba angot sa uman nga pagduso nga makaangkon it bike lane sa mga nagapangunang karsadahon sa probinsya it Aklan.
Suno kay Aklan first district board member Nemesio Neron, nagakadapat nga taw-an it igtaeopangod ro mga siklista pinaagi man sa pagta-o kanda it nagakaigong daean sa mga maeapad nga karsada.
Apang, aminado si Neron nga inde raya tanan eubusan nga maimplementar bangud nga ginakonsidera man ro pondo.
Ro manami sigon kara hay una eon sa programa it Department of Public Works and Highways ukon DPWH kon siin gin-umpisahan eon nanda sa ibang lugar kasunod it andang road widening project.
Apang, sa amat-amat hay posible nga matuman gid raya sa tanan nga banwa sa probinsya bangud nga ro proposal hay unang ginduso sa 18th Sangguniang Panlalawigan ag uman raya nga ginabuhi sa 19th Sangguniang Panlalawigan sa panibag-o man nga administrasyon.
Madumduman nga kapin sa tatlo ka mga siklista ro natumba ag nakaangkon it lastro sa kaeawasan sa national highway it banwa it Makato ko nagtaliwan nga adlaw matapos nga gin-arado it motorsiklo
