KALIBO, Aklan—Ro Leprosy hay sangka masakit nga puweding mabueong rason nga indi puweding kahadlokan bangud raya hay nagakinahangean eamang it timprano nga pagbueong.
Suno kay Dr.Glenford Refre, sangka internist- pulmonologist nga ro leprosy ukon ginatawag man nga Hansen’s disease hay tuga it Mycobacterium leprae.
Raya hay puweding maipsa it sangka tawo pamaagi sa droplets ukon kung ro sangka pasyente nga may leprosy hay mag-ubo ukon maghatsing ag masinghot it anang kaiping.
Masami nga nagabuhay it tatlo hasta it limang dag-on ro incubation period it leprosy.
Apang may mga kaso nga pilang dominggo ukon hasta it 20 anyos antes nga magguwa ro senyales ag sintomas it leprosy.
Ro mga sintomas kara hay ro Skin lesion ukon ro nina nga naga iba ro kulor kung igakumpara sa panit; madamoe , matig-a ag medyo maea nga panit; pagpanaeakit it kaeawasan; nagapangmanhid nga parte it panit ;ag problema sa mata nga puweding mauli sa pagkabulag.
Puwedi nga ma diagnose ro leprosy pamaagi sa physical examination it mga nina.
Samtang nagapatigayon it skin biopsy sa mga suspected case it leprosy.
Ro timprano nga pagkadetect it leprosy ag timprano nga pagbueong ro pinakamadali nga pamaagi agud nga makontrol ag malikawan ro pagkalhit it nasambitan nga masakit.
