KALIBO, Aklan—Ginpaidaeum sa temporaryong lockdown ro bilog nga building it Municipal Hall it banwa it Lezo matapos nga magpositibo ro sangka empleyado sa Coronavirus Disease 2019 ukon COVID-19.
Sa idaeum it Municipal Executive Order nga girmahan ni mayor Mary Lynette Fernandez, gin-umpisahan ro lockdown ko Enero 4, Lunes nga adlaw, ag magabuhay it hasta sa Enero 8.
Raya hay agud nga taw-an it daean ro pag-disinfect sa bilog nga edipisyo ag magapatigayon it covid testing nga igapatigayon sa Miyerkules nga adlaw ag massive contact tracing sa mga tawong nakasalamuha it andang empleyado it treasurer’s office.
Ginasugid nga ro empleyado hay natapnan it anang unga nga covid positive.
Naka-isolate eon sigon ro empleyado sa Aklan Training Center.
Samtang, sa Lunes suno kana, Enero 11 hay magabalik ro andang normal nga operasyon.
Nagtaeana sigon imaw it skeletal personnel para sa mga importanteng transaksyon.
Mag-eowas kara, ro tanan nga mga empleyado nga naka work from home hay on-call eabi eon ro andang personnel it MDRRMO engkasong nga kinahangeanon ro andang serbisyo.
