KALIBO, Aklan–Ginpasakaan eun it kasong Swindling ‘pangpangloko’ ag Thief ‘pagpanakaw’ ro sangka miyembro it LGBTQ+ Community nga nag-viral ko kan-o eamang matapos ro ginhimo nga pagpang-biktima sa pilang ka mga establisyemento pinaagi sa “palit-pera modus” sa nagkaeain-eain nga banwa sa probinsya it Aklan.
Ro suspek hay nakilaea kay Ebert John Santillan, 36-anyos, residente it 103 Dominggo Street, Sampaloc, Manila kaibahan ro sangka babaye nga ginkilaea kay Donabelle Izguerra, 32-anyos, residente it 949 Santiago Street, Sampaloc, Manila.
Ro daywa hay naaresto sa bahin it Batangas Port matapos nga gin-berikipika ro andang pagkatawo kung siin positibong natumod nga sanda ro responsible sa pagpang biktima sa sangka establisysmento nga ginapanag-iyahan ni Carlos Santillan sa bahin it Brgy. Gibon, Nabas.
Madumduman nga madasig nga nagkalhit sa social media ro mga litrato ag kopya it CCTV footage halin sa mga establisyemento nga gin-adtunan ni Satillan.
Nauna eon nga nadakpan it mga otoridad ro ginasugid nga kasabwat kara sa banwa it Banga.
Sa interbyu it Bombo Radyo, ginpahayag ni Donabelle Izguerra mga magabakasyon eamang kungta sanda nga magbarkada sa Isla it Boracay kat naduean it kwarta si Santillan rason nga nahimo kara nga magpangloko.
Dugang pa kara nga owa eun sanda it kwarta nga pamasahe pauli ag ro pagpanakaw eun lang ro andang nakikita nga pamaagi agud makabalik sa Manila.
Sa pihak nga parte ginpahayag man ni Ebert John Santillan, 36-anyos, residente it 103 Dominggo Street, Sampaloc, Manila nga gusto eun nana nga makauli sa andang lugar.
Emosyunal man raya matapos nga maaresto it mga otoridad bangud problemado sigon imaw kung siin mabo-oe it kwarta nga pang-piyansa agud nga makaguwa sa presuhan.
