KALIBO, Aklan—Ginklaro it Consultant it office of the Mayor it banwang Balete nga uwa it ginpatuman nga lockdown sa andang lugar.
Raya hay kasunod sa ginpaguwa nga executive order number 34 series of 2020 ni Balete Mayor Dexter Calizo.
suno kay Mr. Apolinar Cleope, ro nasambit nga EO hay nagapatuman eamang it home restriction sa mga pumueoyo ag bukon it lockdown agud nga malimitahan ro hueag sa andang banwa kasunod it mga nailistang kaso it mga tinamaan it coronavirus disease ukon Covid-19.
Ginpaathag nga ro mga pumueoyo nga may importanteng panaw kaparehas it mga nagatrabaho adlaw-adlaw hay pwede mat-ang makaguwa ag uwa it ginpatuman nga border control mag-eowas eon lang sa ginbutang nanda nga health checkpoint.
Sandig sa EO, ro mga bisita sa andang banwa nga uwa it opisyal nga bussiness hay raya ro ginabawaean ag eabi eon gid ro mga pumueoyo nga uwa man it importanteng panaw hay mas makapamayad nga magpabilin eon lang sa tagsa nanda ka panimaeay.
Suno pa kay Cleope, temporaryong ginsarado ro andang public market kahapon nga adlaw agud nga magpatigayon it dis-infection.
Bangud kara, ginaengganyo nanda ro mga pumueoyo nga sa mga talipapa sa kabaryuhan eon lang anay magpatindahan agud nga malimitahan ro sigidas nga paggilinuwa ag paggutok it mga tawo.
Ro restriction of movements sa nasambit nga banwa hay magabuhay hasta sa Oktobre 20,2020.
