KALIBO, Aklan—Sa pihak it ginapangatubang nga krisis it nasyon bangud sa Coronavirus infectious Disease ukon COVID-19, naglunsar ro lokal nga gobyerno sa banwa it Balete it programa nga makabulig sa andang pomoeuyo nga masok-ean ro pandemya.
Pinaagi sa inisyatibo it mga opisyalis it nasambitan nga banwa, nakahimo it programang gintawag nga GABERDENG BANAWANG sa banwa it Balete kung sa siin tuyo kara nga mataw-an it supply it mga tinuean-on ag prutas ro kada panimaeay.
Suno kay Balete Vice Mayor Patrick Lachica nga ro nasambitanag aktibidad hay agud nga masiguro ro kaeuwasan it kada residente sa tunga it paeag it makamaeatay nga sakit.
Dugang pa kara nga importante man nga masiguro nga masustansiya ro andang ginakaon bilang pangotra sa virus.
Nagaserbi man rayang pangabuhian para sa mga indibidwal nga naduea-an it trabaho sa tunga it ginapatuman nga mga community quarantine ag lockdown.
Samtang, ro Eco Garden sa mga eskwelahan hay magaturo man sa mga pamatan-on kung ano ro importansiya it gardening ag environmental awareness.
Nasayuran nga mag-euwas sa Gaberdeng banawang hay maabo pang iba ro ginlunsar nga programa it LGU-Balete nga nagatuyong mabuligan ro andang mga residente nga indi malisdan makarun nga tyempo it krisis.
