KALIBO, Aklan—Matapos nga ma-classify nga high risk area it Department of Health Regional Office 6, nagpatuman it mas hugut nga quarantine rules ro lokal nga gobyerno it Balete agud nga matapna ro pagkalhit it peligro it COVID-19 sa nasambit nga banwa.
Raya hay nakabaehag sa daywang ka Executive Orders nga ginpaguwa ni Balete OIC mayor Patrick Lachica.
Ginpaathag ni Apolinar Cleope, consultant it office of the mayor nga nataeupangdan ro pagtaas it infections it coronavirus sa sueod it daywang domingo.
Maskin nga manaba sigon ro andang kaso ag owa man it nailistang namatay, apang kun ikumpara sa andang populasyon hay mabahoe ro peligro kara it transmission.
Umpisa Mayo 31, ro kaso it covid 19 sa balete hay naga-abot sa 70 kun sa siin 26 ro aktibong kaso ag presenteng naka facility quarantine.
Suno pa kay Cleope nga base sa ginpaguwa nga Executive Order No. 21 nga naging epektibo ko Mayo 31 hasta June 15, bawae anay nga makaguwa ro mga residente mag-eowas sa mga Authorized Persons Outside of Residence ukon APOR partikular ro mga may trabaho ag balido nga transaksyon.
Sandig pa sa mas instrikto nga patakaran, sambilog eamang nga miyembro it pamilya ro ginapasugtan nga makaguwa agud nga makabakae it mga kinahangeanon sa sueod it panimaeay.
Bawae anay nga makasueod sa Balete ro mga Locally Stranded Individuals ukon LSIs ag ro mga owa it importanteng panaw idtu.
Bangud kara, ginsuspinde anay it LGU-Balete ro distribution it mga modular materials sandig sa konsultasyon sa Department of Education.
Sa pihak nga parte, ginpaathag pa ni Cleope nga ro EO No. 22 hay angot sa paglimita sa mass gatherings kapareho it sunday worship.
Antes ro mga okasyon, kinahangean nga magbo-oe anay it clearance halin sa barangay agud nga ma-inspection ro lugar ukon venue nga pagahiwatan it event kamana man nga matumod ro 30 porsiyento nga kapasidad kara.
Mag-eowas kara, kinahangean nga masunod ro minimum protocol and health standards kapareho it pagsuksok it face masks ag face shields, paghugas it alima gamit ro tubi ag sabon ukon paggamit it alcohol, paglikaw sa mga matawong lugar ag pagsunod sa physical distancing kamana man ro pagpabakuna kontra sa COVID-19.
Samtang, mas pang ginpahaba ro curfew hours umpisa alas 8 it gabi-i hasta alas-5 it aga-aga ag uman nga nagpatuman it liquor ban.
