KALIBO, Aklan–Nakataeana nga i-selebrar it banwang Balete ro ika-13 anyos it andang ginlunsar nga Kultura Balete ag Haboe Balete 2023 kadungan it National Arts Month makaron nga buean it Pebrero.
Suno kay Vice Mayor Patrick Lachica nga tuyo kara nga ipakita ro nagkaeain-eain nga performances ag field of arts it mga pumueoyo eabi eon ro pamatan-on.
Sambilog pa sa importanteng katuyuan it lokal nga gobyerno hay i-inspire ro pagiging creative ag artistic it mga Baleten-on pinaagi sa pagpakita it andang kultura.
Kamana man ro pagpromote it cultural awareness sa bilog nga komunidad ag i-angot raya sa industriya it turismo.
Nasayuran nga sambilog ro Balete sa mga banwa nga nagatao it mabahoe nga pagpahaega sa kultura ag tradisyon.
Dugang pa it bise alkalde nga owa sanda nagpundo sa pagpatigayun it mga programa ag aktibidad maskin sa tyempo it pandemya agud nga mapadayun ro andang adbokasiya.
Pila sigon sa andang ginpahaum nga programa makaron nga dag-on hay ro Pinoy Tiktok dance contest, Kultura Balete reels contest, art exhibit it Balete Community College samtang ro Department of Education (DepEd) hay makaangkon man it Sining at Agham, Eco Art.
Ginkangay man kara ro publiko nga makiparte sa andang selebrasyon agud nga masaksihan kung paano nanda ginataw-an it importansya ro kultura it andang banwa sa nagkaeain-eain nga pamaagi.
