KALIBO,Aklan — Ginatun-an makaron it lokal nga gobyerno it Banga nga magpatuman it mas mabug-at nga penalidad sa sin-o man nga madakpan nga nagahana nga magpaeusot it buhi nga baboy paguwa sa probinsiya it Aklan.
Raya ro ginpahayag ni Banga Mayor Noel Redison kasunod it uman nga pagkadakop sa sangka truck nga kargado it kapin sa 100 nga mga buhi nga baboy nga naharang sa checkpoint nga andang ginplastar bilang tikang agud nga matapna ro african swine fever ukon ASF outbreak sa probinsiya pasado alas-3:00 kaina it aga-aga.
Ro nasambit nga mga baboy hay ginasugid nga naghalin sa banwa it makato ag pagadaehon kunta sa Iloilo.
Sa kamatuoran suno kay mayor redison nga makapilang beses eon sanda nga may nadakpan nga hana nga nagapa-eusot it buhi nga baboy eabi eon sa dis-oras it gabi-i ukon tiempo it aga-aga kon sa siin pila sa mga raya hay ginkarga sa dump truck.
Samtang, plano ni mayor redison nga imbes nga ipabalik sa point of origin ro mga na-apprehend nga baboy hay i-impound ro saeakyan ag kasuhan ro mga responsabli.
Posible sigon makaron nga Domingo hay pagahinyuon nanda sa Sangguniang Bayan nga mag-draft it ordinansa angot sa nasambit nga plano.
Nagapabilin nga ASF free ro Banga, apang padayun ro panawagan it alkalde sa mga livestock growers sa banwa nga i-report sa andang Municipal Agriculture Office ro sin-o man nga namatayan it alagang baboy agud nga maboe-an it blood sample para kumpirmahon kon tinamaan it ASF virus.
Sa makaron hay 10 eon nga banwa sa Aklan ro infected it virus
