KALIBO, Aklan — Uman nga nadag-an it banwa it Ibajay ro andang ika-ap-at nga Seal of Good Local Governance (SGLG) award halin sa Department of the Interior and Local Government (DILG).
Suno kay Ibajay Mayor Joen Miraflores nga eubus ro andang kalipay matapos nga sambilog sanda sa mga local government units ukon LGU sa probinsiya it Aklan nga nakapasa sa ginahandum nga SGLG makaron nga 2019.
Nagpasaeamat man ro alkalde sa DILG bangud sa pagkilaea sa matuod ag mayad nga pagserbisyo it LGU-Ibajay sa andang mga pumueuyu .
Ginpahayag dugang nga ro award hay magaserbi nga inspirasyon sa tanan nga mga opisyal ag empleyado it banwa nga padayun nga magatau it may kalidad nga serbisyo sa mga Ibajaynon.
Nasayuran nga ko 2015, 2016, ag 2017 hay sambilog man sanda sa mga recipients it prestihiyosong SGLG award.
Ro SGLG hay sangka programa nga nagatau it award, insentibo, pagkilaea ag pasidungog sa tanan nga mga LGUs, ag padayun nanda nga commitment agud nga mapa-umwad ag mapa-improve ro andang performance.
Pila sa mga ginabasehan kara hay ro mayad nga performance it LGU sa nagkaeain-eain nga pagdumaea kapareho it financial administration, disaster preparedness, social protection, peace and order, business-friendliness and competitiveness, environmental management, tourism, culture and arts.
