KALIBO, Aklan—Nag apela si League of the Municipalities of the Philippines ukon LMP Aklan chapter president ag Ibajay mayor Jo-en Miraflores sa anang mga nasakupan nga likawan anay ro pagtipon-tipon bangud sa pagkabaeaka nga raya ro mga posibleng maging rason it madasig nga pagkalhit it virus.
Raya hay kasunod it anang ginpaguwa nga executive order nga nagalimita sa 50 porsiyento it seating capacity sa mga ginapatigayon nga selebrasyon kapareho it mga birthday, bunyag , kasae, ag iba pa.
Ro mandu hay naging epektibo Huwebes nga adlaw, Mayo 27 kun sa siin bukon eamang it mga baeay ro sakop kara kundi maskin ro simbahan ag iba pang reception areas.
Maskin suno kana ro munisipyo hay limitado man ro pagpatigayon it mga mabahoe nga mga gathering.
Ginklaru it alkalde nga owa man eubusan nga ginabawae ro mga okasyon apang kinahangean eamang nga limitahan ro mga bisita.
Mas mayad suno kana nga magpamilya eang anay ag indi eon magkangay it ibang mga bisita.
Ro mga okasyon suno kana nga may mga pagtipon-tipon it mga tawo hay posibleng pwedeng maging “superspreader” it mga virus.
Peligroso sigon raya eabi eon kon nalipatan eon ro physical distancing ag owa pagsuksok it face mask.
Kadungan kara, ginhinyu nana nga seryosohon ro pagsunod sa mga health protocol eabi eon makaron nga padayun nga nagatinaas ro kaso it covid 19 sa probinsiya it Aklan.
Ginkalipay man nana nga ginpahayag nga zero active cases sanda makaron sa banwa it Ibajay.
