KALIBO, Aklan—Puro religious activities ro gintutukan it lokal nga gobyerno it Ibajay para sa selebrasyon it andang kaugalingon nga bersyon it Ati-atihan Festival ag debosyon kay Sr. Sto. Niño.
Suno kay Ibajay mayor Joen Miraflores nga naging maayos ro pagpatigayon it pagdu-aw it mga deboto kasunod it pagsaylo sa imahe it Sto. Niño de Ibajay sa simbahan it Saint Peter the Apostle nga imaw ro highlight it festival.
Bantay sarado suno kana it mga kapulisan ro linya ukon pila sa guwa it simbahan ag pagpatuman it health protocol eabi eon ro pagsunod sa physical distancing, pagsuksok it face mask ag faceshield bangud sa paeag it covid 19.
Sa kaadlawan it domingo hay makaangkon it kada oras nga misa nga maga-umpisa alas-5 it aga-aga ag bandang alas-9 hay magapatigayon it high mass nga iga-selebrar ni bishop Jose Corazon Talaoc.
Ginaeauman suno kana nga maging maayos gihapon ro sitwasyon sa pagsueod sa simbahan it mga deboto sa bulig it mga marshalls.
Limitado ro pwedeng makasueod sa simbahan rason nga magabutang it TV monitor sa guwa agud nga ro ibang deboto hay sa guwa eon lang magapamati it misa.
Pagkatapos it misa hay uman nga magapatigayon it public viewing.
Iga-prusisyon sigon ro imahe ni Sto. Niño de Ibajay sakay it saeakyan halin sa simbahan ag igalibot sa bilog nga parokya.
Gindugang pa ni Mayor Joen nga maskin nga masubo, apang kanselado ro ibang aktibidad kapareho it sadsad panaad kamana man ro maskin ro pagpatik it tamboe ag ro pagpamiyesta agud nga malikawan ro mass gathering.
Nagpanawagan man si Mayor Joen sa mga deboto nga pagkatapos nga magsimba hay magderetso eon it uli ag likawan nga magwinarang pa agud nga makalikaw sa deadly virus nga padayun ro pagtaas it kaso sa Aklan.
