KALIBO, Aklan—Nagkasugot ro lokal nga gobyerno it Kalibo ag ro Department of Education (DepEd) nga magpirma it kasugtanan angot sa paggamit it mga pasildad sa KISEC ag Kalibo Elementary School bilang temporaryong quarantine facility.
Suno kay Kalibo Sangguniang Bayan member Augusto Tolentino nga nagpadaea it sueat ro DepEd sa opisina it Mayor Emerson Lachica ko Agosto 6, kaeakip ro sangka resolusyon nga naga-request nga magpirma it term and condition sa tunga it magtimbang nga parte.
Ro kaundan sigon it term and condition hay ro mga sueondanan sa paggamit it mga pasilidad it daywang eskwelahan.
Nakasueod man sigon kara nga dapat magsunod ro lokal nga gobyerno sa guidelines ag protocol it Deparment of Health ag World Health Organization.
Dugang pa ni Tolentino nga haum eon ro mga kwarto it eskwelahan kamana man nga ginabak-ean eon raya it mga ginakinahang-ean nga kagamitan.
Nauna eon nga ginpasugtan it DepEd-Aklan ro pagpaggamit it kapin sa 40 ka mga kwarto it daywang eskwelahan matapos nga ginkabig nga epicenter it COVID-19 ro Kalibo.
Mag-eowas kara, naging punuan man ro mga gintaeana nga quarantine facility it banwa rason nga mabahoe ro maibulig it daywang eskwelahan para makaangkon it dugang nga pasilidad.
Target sigon it LGU nga igabutang kara ro mga magpamilya, magkatrabaho ag magkabarkada nga nakaangkon it COVID-19 infection.
