KALIBO, Aklan—Ginkalipay ni Barangay Poblacion Councilor Mark Sy it banwa it Kalibo ro pag-adopt it munisipyo sa andang gindihon nga gathering ordinance.
Raya hay may kaangtanan sa pag-require sa mga nagapatigayon it okasyon sa mga kabaeayan nga magbo-oe anay it barangay clearance.
Ginklaru sigon ni Kalibo mayor Emerson Lachica sa anang mandu nga libre ukon owa it bayad ro nasambit nga clearance.
Nasayuran nga antes ro okasyon kapareho it birthday, kasae, bunyag ag maskin namatyan hay kinahangean anay nga ma-inspection it barangay council ro baeay ukon venue nga pagahiwatan it okasyon agud nga matumod kon pila ro 50 porsiyento nga kapasidad it bisita ag masiguro nga mapatuman ro physical distancing.
Dapat man sigon nga kompleto sa gamit kapareho it logbook, thermal scanner, alcohol, footbath ag iba pa.
Ginpahayag pa ni konsehal Mark Sy nga tuyo kara nga matapna ro pagkalhit it coronavirus kun sa siin ro mga pagtipon-tipon ro ginaturo nga superspreader it virus.
Sa Mayo 30 ukon Domingo nga adlaw hay magiging epektibo eon ro nasambit nga sueundanan sa 16 nga barangay sa Kalibo.
Kaibahan kara ro pagpatuman it bag-ong oras it curfew nga alas-9:00 it gabi-i hasta alas-4:00 it aga-aga halin sa dating alas 10:00 it gabi-i hasta alas 5:00 it aga-aga.
Hugut man suno kana nga ginapatuman nanda ro quarantine ordinance agud nga malikawan ro pagwinarang it mga tawo nga naka isolate ag ginakabig nga mga high risk contact.
Samtang, padayun ro pag apela it opisyal nga seryosohon sa gihapon ro pagpatuman it minimum health protocol eabi pa ag ro poblacion kalibo hay may nailista pa nga 26 nga aktibong kaso it deadly virus.
