KALIBO, Aklan—Gin-umpisahan eon it lokal nga gobyerno it Kalibo ro pagbakuna kontra sa COVID-19 sa andang mga empleyado nga kaibahan sa A1 beneficiaries nga mataw-an it proteksyon.
Kaibahan sa nasambit nga kategorya nga nagbaton it bakuna gamit ro Sinovac COVID-19 vaccines hay ro mga frontliners kapareho it mga staff it Municipal Health Office, tawuhan it Municipal Disaster Risk Reduction and Management Office ukon MDRRMO, mga barangay workers ag iba pa.
Suno kay Mrs. Niña Dela Cruz, 77 anyos it barangay Pook, Kalibo nga owa eon imaw nagduha-duha pa nga magpabakuna bangud nga pirme imaw nga expose sa tawo bilang sangka barangay health worker.
Nagpangayo man sigon imaw it clearance halin sa anang doktor antes nga nagpabakuna.
Raya hay sa pihak it pag angkon nana it high blood ag diabetes.
Sa makaron hay padayun sigon nanda nga gina engganyo ro iba pang mga senior citizens ag persons with comorbidities sa andang barangay nga magpabakuna man sa oras nga maging available ro bakuna.
Sa pihak nga parte, ginpahayag ni Terrence Jun Toriano, head it MDRRMO-Kalibo nga para sa 107 nga katawo ro andang gin-pick-up nga bakuna halin sa cold storage facility it Provincial Health Office paagto sa vaccination site sa covered court it Kalibo Pastrana Park.
Owa man suno kana it naging aberya sa ginpatigayon nga inoculation ag owa man it nakaangkon it adverse effect ro mga nabakunahan.
Ro tanan sigon nga mga naturukan hay naka pre-register eon antes nga nakabaton it unang dose it covid vaccine.
