KALIBO, Aklan—Ginabawae anay it lokal nga gobyerno it Kalibo ro pagpaligos sa mga baybayon ag kasubaan nga sakop it banwa it Kalibo umpisa Abril 1 hasta 2, 2021 sa pagdumdum it semana santa.
Raya hay matapos nga magpaguwa it mandu ro LGU Kalibo nga pirmado ni mayor Emerson Lachica agud nga malikawan ro mga pag-excursion ag pag-inuman nga nagiging rason it pagtipon-tipon it mga tawo, kun sa siin hay naeabag ro physical distancing.
Angot kara, ginabawae anay ro mga party celebrations ag iba pang mass gatherings sa mga baybayon it Kalibo partikular sa Mabilo, Caano, Pook, Andagao, New Buswang, Bakhaw Sur, Bakhaw Norte kamana man sa mga suba nga sakop it Poblacion, Tinigao, Estancia, Mobo, Tigayon, ag Linabuan Norte.
Sakop man it mandu ro mga resorts ag amusement places nga may swimming pool nga una sa hurisdiksyon it Kalibo.
Tuyo it nasambit nga tikang nga matapna ro pagkalhit it covid 19 virus ag iba pang mga variants kara.
Nasayuran nga kaeabanan sa mga pumueuyu hay nagaselebrar it Domingo de Pascua ukon adlaw it pagkabanhaw sa mga baybayon.
Bawae man ro pakikipag-inuman sa mga pampublikong lugar , bars, restaurants, KTV bars ag iba pa.
Ro mandu hay sandig sa IATF omnibus guidelines sa pagpatuman it community quarantine sa nasyon.
