KALIBO, Aklan—Sa tuyo nga makaangkon it dugang nga atraksyon sa Pook jetty port, ginaduso makaron it lokal nga gobyerno it Kalibo nga magpatindog it light house ukon parola sa lugar.
Suno kay sangguniang bayan member Ronald Marte nga ginmanduan eon imaw ni Kalibo mayor Juris Sucro nga mag-usoy it lote nga mga 300 square meters ro eapad para patindugan it parola.
Ginpahayag pa nga ro parola hay nagatau it kahayag sa dagat ag bibi it baybay para sa mga mangingisda ag raya hay may kontribusyon sa industriya it turismo.
Suno pa kay SB Marte nga ro lighthouse hay manami nga spot agud nga makapag-chill ukon makapag-relax maeayo sa masako nga kabuhi it banwa kun sa siin pwedeng makapoepamahaw ag maka-inom-inom sa lugar.
Dugang pa nga ro parola hay nagadaea it romantic vibe eabi eon pagkatapos it sunrise ukon antes ro sunset.
