Malipayon ro naging pagbalita ni Carla Suner Doromal ro Executive Assistant I to the Office of the Municipal Mayor it LGU Kalibo nga naging madinaeag-on ro pagselebrar it Mother of All Philippine Festivals ukon ro Kalibo Sto. Nino Ati-atihan Festival 2024.
Mahambae sigon nana nga worth it ro tanan nga ginhimo nanda halin pa ku dag-ong 2023 kung siin nga ginakabig nga ro pagbisita it sikat nga singer nga si Bamboo ro sambilog sa mabahoe nga aktibidad nga ginpartisiparan it haeos 75,000.
Bukon man sigon it perpekto ro mga naging aktibdad pero uwa man gid nakapangatubang it seryoso nga mga aberya.
Pagdugang pa ni Doromal nga nagapasaeamat imaw sa Chairperson it Sadsad Committee para sa Kalibo Sadsad Ati-atihan Contest 2024.
Nagpakita man it mabahoe nga suporta ro LGU Kalibo pinaagi sa pinansiyal sa mga grupo nga nagpartisipar kung siin nga sa dag-ong 2025 basi sigon magtaas pa ro numero it mga grupo nga makigbahin.
Pagpati nana nga ro mga tribu ukon grupo nga naga intra hay bukon it bangud sa kwarta o premyo kundi sa panaad ag debosyon.
Sa pagbanta may una nga 50,000 ka mga tawo ro nagdagsa sa ginpatigayon nga Pilgrim mass ku kaadlawan ku kapistahan nga nagapakita it grabe nga debosyon it mga pumueoyo ag dumueong kay Sr. Sto. Nino samtang may una nga ginabuebanta 120,000 man ro nagpartisipar ku bisperas nga nagtuga it kabudlay sa trapiko.
Raya hay pamatuod nga may positibo nga epekto sa turismo it banwa ku Kalibo.
Samtang parte man sa mga nagtuhaw nga komosyon sa daywang banda, nagpapanaog it EO ro alkalde ag gintao sigon sa legislative department ro desisyon kung anong penalidad ro igatao kanda.
Nagpaabot man imaw it pasaeamat sa tanan nga nagpanguna ag tanan nga tawo sa likod it madinaeag-on nga selebrasyon.
Magahiwat man sigon sanda it closed event assessment nga pangunang tikang sa pagpreparar para sa sa masunod nga dag-ong Ati-atihan Festival.
Masayuran nga sa masunod nga dag-on magiging 1.2 million eun ro pagabatunon it maging kampeon sa Tribal Big Category.
