KALIBO, Aklan—Ginklaro ni Executive Assistant to the Mayor Mr. Basil Tabernilla nga uwa nagpabaya ro lokal nga gobyerno it Kalibo sa pag-aksyon angot sa maeawig nga leave of absence ni Dr. Macarius Dela Cruz, municipal health officer it banwa it Kalibo.
Suno kana, nagpaguwa it memorandum ro alkalde sandig sa rekomendasyon it human resource management office partikular ni HR officer Mrs. Leonor Isada.
Ginpahayag nga ko buean pa it Nobyembre nagdihon it leaved of absence si Dr. Dela Cruz nga insigida man nga ginpasugtan it HR kon sa siin ro oras kara nga inugbalik sa trabaho hay uwa nana natuman sa baylo nagpangayo pa imaw it extension sa sueod it tatlong buean halin January 3 hasta it March 6,2020 kon sa siin insigida man nga ginpasugtan.
Sa pihak kara, uman nga nagpangayo it extension si Dr. Dela Cruz bangud nga nagabueong raya sa anang himata sa nasyon it Canada hasta nga naabutan it lockdown.
Ro inugbalik sigon kara sa trabaho hay May 1 apang uwa gihapon imaw nakasueod hasta makaron nga buean kon sa siin ginrekomenda eon it HR nga kakason imaw bilang empleyado it munisipyo.
Sa bahin ni Kalibo Mayor Emerson Lachica, bukon eon it makatarungan ro gina-ayo nga extension for leave of absence ni Dr. Dela Cruz kon sa siin sigidas pa ro anang sweldo halin sa gobyerno rason nga nagpaguwa imaw it memorandum nga naga-apruba sa rekomendasyon it HR.
Si Dr. Dela Cruz hay ginakabig nga AWOL sa trabaho ukon absent without official leave bilang frontliner ag eubus nga kinahang-ean makaron it mga pumueoyo sa tunga it ginapangatubang nga pandemya.
