KALIBO, Aklan—Ginpueong it lokal nga gobyerno it Kalibo ro mga natungdan nga barangay kapitan kaangot sa mga nagsoeputan nga talipapa sa kada baryo.
Suno kay Municipal Economic Enterprise Development Office (MEEDO) Kalibo head Engr. Jessie Fegarido, nagkasugot sigon ro natungdan nga mga punong barangays nga i-identified ro lugar nga pagabutangan it talipapa ag idto maga-ililiba ro mga manugbaligya.
Sa kamatuoran suno kana hay uwa it mga permit ro mga talipapa sa kabaryuhan rason nga ro tag-iya it eogta hay nagareklamo eon man.
Ginpaathag nga kinahang-ean it LGU ro revenue nga magasustiner sa krisis nga ginapangatubang tuga it pandemya rason nga kinahang-ean nga maging legal ro andang negosyo pinaagi sa pagbueo it permit.
Ginatan-aw nga paborable sa mga manugbakae ro talipapa bangud nga inde eon nanda kinahang-ean nga magpabanwa tuga it mahae nga pamasahe kamana man ro mga 60 anyos pataas hay una lang mismo manindahan sa andang baryo.
Samtang sa pihak nga parte, ginklaro ni Figarido nga uwa pa sanda it nabaeay nga guidelines nga maging sueondanan it mga negosyante nga presenteng nagabaligya iya sa Oyotorong.
Aminado si Figarido nga maabo dikara ro uwa pa it mga permit raya sigon ro andang ginaasikaso makaron kasunod eon man it pila ka mga reklamo nga nabaton it anang taeatapan.
