KALIBO, Aklan — Gintaw-an it pasado nga grado it validation teams it Department of Interior and Local Government (DILG) ro lokal nga gobyerno it Kalibo sa pagtapos it deadline ko Lunes, Setyembre 30 para sa ginmandu nga clearing operations.
Ko Biyernes nga adlaw hay ginpatigayon ro inspeksyon sa banwa it Kalibo, kun sa siin, gin-usisa kon nalimpyuhan ag nabo-oe ro tanan nga road obstructions sa andang nasakupan.
Suno kay Matt Aaron Guzman, chairman it Committee on Transportation it Sangguniang Bayan it Kalibo nga owa eon namitlang kon pila ro andang rating ukon percentage.
Ro validation team hay ginaeakipan it Local Government Operations Officer ag mga representante halin sa Philippine National Police, Bureau of Fire Protection, Bureau of Jail Management and Penology, DILG-accredited non-government organization ag media.
Sanda ro naghusga kun pasado ukon bukon ro ginpatigayon nga clearing operations.
Gindugang pa ni Guzman nga kinahangean nga ma-sustain ro naumpisahan nga paglimpyo rason nga nag-apela imaw sa publiko ag mga motorista nga magbuylog ag sanda mismo ro magkakas it mga bagay-bagay, istraktura, ukon iba pang kagamitan nga nakasab-eag sa karsada .
Sa kamatuoran suno kana hay gindayaw pa it DILG ro andang effort bilang sangka 1st class municipality.
Nasayuran nga pagataw-an it show cause order ro mga LGUs nga indi magasunod sa mga sueundanan it DILG angot sa road clearing nga igasumite kay Pangueong Rodrigo Duterte.
