KALIBO, Aklan–Umpisa Hunyo 19 hasta 27 it makaron nga dag-on hay hugut nga ginabawae it lokal nga gobyerno ro pagpatigayon it mga excursion sa mga baybayon, kasubaan ag maskin sa mga swimming pool it mga inland resorts ag hotels sa banwa it Kalibo sa tunga it paeag it covid-19.
Raya hay sandig sa ginbag-o nga executive order ni Kalibo mayor Emerson Lachica angot sa selebrasyon it kapistahan ni San Juan de Bautista sa Hunyo 24.
Suno kay Mr. Basil Tabernilla, Executive Assistant to the Mayor nga tuyo kara nga malikawan ro mass gathering nga ginaturo nga super spreader it coronavirus.
Obligado suno kana nga magsunod kara ro publiko bangud nga hugut nga pagabantayan it mga otoridad ro nasambit nga mga lugar.
Uman kara nga ginpadumdum nga may ginapatuman pa nga liquor ban.
Tradisyon eon it mga kalibonhon ro pagpaligos sa mga baybay, kasubaan ag iba pang paealigsan kada pista ni San Juan de Bautista nga imaw ro patron it Kalibo.
