KALIBO, Aklan—Nagpatuman it mas hugut nga tikang ro lokal nga gobyerno it Numancia agud nga matapna ro mas pang pagkalhit it African Swine Fever ukon ASF.
Raya hay kasunod it ginpatigayon nga hinun-anon kaibahan ro Office of the Provincial Veterinarian, mga stakeholders, hog raisers ag iba pa ko Mayo 22 sa Numancia sports and cultural center.
Suno kay market supervisor Augusto Yeban nga kaibahan sa ginkasugtan hay ro pagpasarado it andang slaughterhouse sa Brgy. Badio ag ro temporaryong pagbawae sa pagbaligya it karne it baboy sa sueod it andang merkado publiko.
Ko nagtaliwan nga Mayo 22 hay pormal eon kunta nga ginpatuman ro kasugtanan, apang naghinyu it tatlong adlaw nga extension ro mga negosyante ukon hasta makaron nga adlaw it Huwebes agud nga madispose pa ro iba nanda nga stock.
Ginpahayag dugang nga kada barangay eon ro border checkpoint, kun sa siin ro mga ginabaligya nga karne it baboy hay kinahangean nga una eamang maga circulate sa andang lugar.
Bangud nga owa eon anay naga-operate ro slaughterhouse, ginapasugtan ro pagkatay it baboy sa andang mga ugsaran apang kinahangean nga may permiso halin sa andang barangay kapitan.
Required man ro pagpadaea it video agud nga makita kon healthy ro ginakatay nga baboy.
Engkaso nga makitaan it anuman nga sintomas it ASF, indi raya pagapasugtan nga makatay ag makonsumo ukon mabaligya.
Ro mandu hay magabuhay hasta nga eubusan nga makontrol ro ASF outbreak sa nasambit nga banwa.
Sa makaron hay naging mahina man ro pagbaligya it karne it baboy bangud sa pagkabaeaka it konsumidor sa nagakalhit nga virus.
Samtang, haeos tanan nga mga hog raisers ag negosyante sa Numancia ro nagakalisod bangud sa naangkon nga pagkalugi.
Gina engganyo man ro mga hog raisers nga namatayan it alagang baboy nga magdangop sa andang barangay council para sa nagakaigo nga documentation sa posibleng mabaton nga mga ayuda.
Gina abisuhan man ro mga residente nga indi anay mag alaga it baboy ag paubuson ro andang naga eksister nanda nga alaga agud nga matapna ro ASF.
