KALIBO, Aklan–Indi gustong madali-on it lokal nga gobyerno it Kalibo ro andang pagtinguha agud nga maangkon ro cityhood status kara.
Raya hay kasunod it kakueangan sa manaba nga populasyon ag land area requirement.
Suno kay Kalibo Vice Mayor Cynthia dela Cruz nga nagaeaum sanda nga mataw-an it katumanan ro andang handum , apang kinahangean anay nga ma-comply ro mga requirements.
Ro Kalibo hay may income nga P400 million pesos eampas sa minimum nga P100 million pesos.
Sa pihak kara, ginapag-isipan pa sigon nanda makaron ro mga pamaagi kon paalin nga madugangan ro populasyon nga naga-abot eamang sa 91,000 nga residente nga maeayo pa sa cityhood requirement nga kapin sa 150,000 residents.
Samtang, ro Kalibo hay kueang man sa land area size nga may 50 square kilometers eamang kumpara sa gina-require nga 100 square kilometers.
Sambilog sa ginakonsidera nanda hay ro pag-convert sa bakhaw norte bilang sangka isla.
Mauna eon nga nagtukod si Kalibo mayor Juris Sucro it komitiba agud nga mag-estudyo kon ano kapreparado ro banwa para sa andang ginaduso nga cityhood kamana man ro bentahe ag disbentahe kara.
Samtang, nagaeaum si Vice Mayor Dela Cruz nga makaangkon pa sanda it chansa pinaagi sa house bill nga ginaduso makaron ni aklan 1st district Rep. Carlito Marquez nga obrahon ro tanan nga capital towns it kada probinsiya nga owa pa it siyudad nga maging component city .
