KALIBO, Aklan—Kapareho sa ginhimo nga tikang ni Iloilo City Mayor Jerry Treñas, nag apela man it dugang nga bakuna kontra Coronavirus Disease 2019 (COVID-19) si Kalibo mayor Emerson Lachica sa tunga it nagatinaas nga kaso it sakit sa banwa.
Suno kana nga ko Hunyo 11 pa hay nakapadaea eon imaw it sueat sa taeatapan ni presidente Rodrigo duterte pinaagi kay Senador Bong Go, National IATF Chairperson Karlo Nograles ag iba pang natungdan nga ahensiya it gobyerno bangud nga bukon sigon it bastante ro COVID-19 vaccines nga naga–abot.
Bilang gateway it mga turista paagto sa isla it Boracay, kinahangean sigon ro dugang nga alokasyon it bakuna ag mapadasig ro vaccination roll-out agud nga makaangkon it kumpiyansa ro mga turista ag iba pang mga bisita.
Nagaeaum ro alkalde nga mataw-an it sabat ro anang ginpadaea nga sueat.
Maskin sigon ro anang magueang nga si dating Kalibo mayor William Lachica hay nagpadaea man it sueat kay Presidential Spokesman Harry Roque ag nagaeaum nga makabaton it positibong sabat kapareho it andang ginhimo nga aksyon sa request ni Mayor Treñas.
