KALIBO, Aklan—Nagaeaum si Kalibo mayor Emerson Lachica nga makabuoe it mataas nga grado sa pagahimuon nga validation sa nagapadayun makaron nga Road Clearing Operation 2.0.
Raya hay matapos nga ginpaeawig pa it Department of the Interior and Local Government (DILG) it hasta sa pebrero 15 ro andang deadline.
Dapat suno kana hay ro Enero 22 kara ro deadline apang gintaw-an sanda it palugit agud nga taw-an it daeean ro selebrasyon it Kalibo Sto. Niño Ati-atihan Festival.
Ginkalipay man it alkalde ro ginahimo nga paglimpyo sa parte it Linabuan Norte ag Mabilo area bangud nga haeos napaeos eon ro tanan nga mga road obstructions.
Ginhinyu man kara ro kooperasyon it barangay captains bangud nga engkaso nga mapas-eawan kaibahan sanda sa pagamultahan.
Pagatutukan man sigon nanda sa road clearing ro Roxas Avenue ag Oyo Torong area kun sa siin gintaw-an it warning ro mga violators.
Engkaso nga indi mag selfdemolish ro andang team ro maga-obra kara para kanda.
Madumduman nga ko nagtaliwan nga dag-on, gin-anunsyo it DILG ro pagpadayun it road clearing operation 2.0 ko Nobyembre 16, 2020, ag gintaw-an ro mga LGUs it 60-diyas agud nga magsunod sa mandu ni Pangueong Duterte nga boe-on ro mga illegal obstructions sa mga karsada ag ibalik ro mga karsada ag mga nagapangunang daeanon sa mga pumueuyu.
