KALIBO, Aklan–Naglunsar it seminar para sa Sustainable Home Grown Food Project ro lokal nga gobyerno it Kalibo agud nga mapabaskog ro food security ag nutrition sufficiency it banwa.
Suno kay Adorada Reynaldo, Building and Maintenance Division Head it LGU-Kalibo nga raya hay bukas para sa tanan nga mga Kalibonhon.
Ro nasambit nga paindis-indis suno kana hay may daywang kategorya nga ginakaeakipan it edible communal garden ag home edible garden.
Ro mga partisipante sigon sa communal garden hay ro mga Sangguniang Kabataan (SK) halin sa 16 nga kabarangayan it Kalibo.
Samtang, ro home garden hay para sa tanan nga mga interesadong home owners nga mahilig sa tanum.
Mag-euwas sa pagpasiguro it food security ag nutrition sufficiency, tuyo man it proyekto nga magiyahan ro mga pumueoyo sa tama nga pagpilak it basura.
Ro kada partisipante sigon hay magapaidaeom sa limang adlaw nga seminar para sa nagkaeain-eain nga kategorya.
Sa maabot nga adlaw it Biyernes suno kana hay nakataeana nga magpakigbahin it pilang diskarte ro sangka resource person nga andang gin-imbitahan angot sa pag-convert it basura bilang abono.
Samtang, sa adlaw it Sabado hay may pagahimuon nga field trip ro mga partisipante partikular sa Meliton Integrated Farm sa Brgy. Libas, Banga.
Ro entry it kada partisipante hay paga-obserbahan sa sueod it tatlong buean kung siin ro awarding hay igapatigayun sa Hulyo kadungan it selebrasyon it nutrition month.
Nasayuran nga may ginpahaum nga mga papremyo ro LGU sa communal garden kung siin ro 1st place hay sarang makabaton it P20,000; 2nd place P15,000, 3rd place P10,000 ag pito ro maga-uli it tig P5,000 bilang consolation prizes.
Samtang, sa home garden posibleng mag-uli ro 1st place it P10,000; 2nd place P7,000 ag 3rd place nga P5,000.
Tuyo sigon kara nga mapukaw ro interes it mga pamatan-on angot sa pagpanguma.
