KALIBO, Aklan–Sigidas eon ro ginahimo nga pagpahaum it lokal nga gobyerno it Kalibo sa tunga it nagahilapit nga selebrasyon it kapiyestahan ni Senior San Juan De Bautista sa maabot nga Hunyo 24.
Suno kay Executive Assistant to the Mayor Basil Tabernilla nga nagbaeay eon sanda it pilang ka mga programa ag aktibidad para sa nasambit nga selebrasyon.
Sambilog eon kara ro pag-organisa it ap-at nga gabi-i nga event nga ginatawag nga “calle comedor” nga igatukod sa bahin it Martelino Street, Kalibo umpisa Hunyo 21 hasta 24.
Kabulig sigon it LGU sa pagbilog it event ro Tourism and Culture Development Program, Municipal Economic Enterprise Development Office ukon MEEDO pribadong sector.
Ginpahayag pa ni Tabernilla nga maabu ro maga-benepisyo sa event bangud bukas raya para sa tanan.
May mga ginkangay man sigon sanda nga mga performers halin sa mga kaeapit nga probinsya para magtukar it banda.
Samtang, may pagaeauman man nga street dancing competition ag maabu nga iba.
