KALIBO, Aklan—Bilang pagdumdum sa ika-125 selebrasyon it Adlaw it Kahilwayan it nasyong Pilipinas, nagpatigayon ro lokal nga gobyerno it Kalibo it flag raising ag wreath laying ceremony sa rebulto it mga baganihan ag beterano it Aklan sa Pastrana Park.
Ro simpleng seremonya hay ginpangunahan ni Kalibo Vice Mayor Cynthia dela Cruz ag iba pang mga opisyal it banwa.
Sa anang mensahe, ginpaabot it bise alkalde nga kinahangean nga mataw-an it importansiya ro pagpalangga sa nasyon eabi eon it mga ulihing henerasyon.
Gintaw-an man kara it pagkilaea ro mga baganihan sa makaron nga tiempo.
Ro sakripisyo sigon it mga ginakabig nga modern day heroes hay indi matupungan.
Bangud kara, ginpasaeamatan it LGU-Kalibo ro tanan nga mga nagsakripisyo agud nga makapagserbisyo sa atong nasyon.
Samtang, ginpahayag man ni Lt. Col. Luis Beran Jr., Aklan Veteran District, Veteran Federation of the Philippines nga kadungan sa selebrasyon it Independence Day, indi pagkalipatan nga balikan ro mga leksyon it nagtaliwan.
Obrahon suno kana nga inspirasyon ro panindugan, pakikipagsukoe ag owa it kabaylo nga pagpalangga nga ginpakita it atong mga baganihan sa atong nasyon.
Gindugang pa ni Beran nga eabaw sa pagkilaea naton sa andang mabahoe nga amot sa gina angkon makaron nga kahilwayan hay obligasyon man naton nga abagahon bilang mga pilipino nga alagaan ro kahilwayan ag isueong ro “bayanihan” kapareho it pagbueuligan ag paghili-usa.
