KALIBO, Aklan–Samtang ginahueat pa ro pag-abot it AstraZeneca vaccines, nagpatigayon ro lokal nga gobyerno it Kalibo kabulig ro health officials it vaccination simulation exercise sa covered court it Kalibo Pastrana Park agud nga makita ro kahauman antes ro actual nga mass vaccination.
Suno kay Kalibo Municipal Treasurer ag Vaccine Czar Rey Villaruel nga sa gintaeana nga vaccination center, nagbutang it mga division para sa registration ag counselling, ro actual nga inoculation ukon pagbakuna, post-vaccination monitoring para sa posibleng side effects, kamana man ro oras ag motion ukon daeagan it kabilugan nga aktibidad.
Nasayuran nga ro LGU-Kalibo hay sambilog sa mga unang munisipyo nga nakipag-negosyar para sa andang kaugalingon nga COVID-19 vaccines.
Madumduman nga nauna eon sanda nga nagpatigayon it simulation exercise ko nagtaliwan nga domingo sa pag-pick-up it bakuna halin sa Kalibo International Airport paagto sa storage facility, kun sa siin ro oras it pagbiyahe hay nag-abot eamang sa masobra sa limang minuto.
Nag-abot eon sigon ro inisyal nga refrigerator ag portable fridge nga gin order nga pagabutangan it bakuna.
Nagpahaum ro LGU-Kalibo it P50 million pesos para sa nasambit nga proyekto.
Daywang vaccination sites ro gintumod kara nga ginaeakipan it Pastrana Park ag kaiping nga Aklan Catholoc College Gym.
