KALIBO, Aklan—Nagpatigayun it mga aktibidad ro lokal nga gobyerno it Kalibo angot sa pagdumdom it ika-124 nga anibersaryo it Independence Day ukon Adlaw it Kahilwayan it nasyon makaron nga adlaw it Dominggo, Hunyo 12.
Suno kay Maranatha Estrada Vargas, Community Affairs Officer II it Public Affairs Information and Communication Division it LGU-Kalibo nga nagpahaum sanda it daywang ka mga mayor nga aktibidad nga ginaeakipan it thanks giving mass sa St. John the Baptist Cathedral pasado alas-7:00 kainang agahon ag ginsundan it annual flag raising ag Independence day program sa Kalibo Pastrana Park.
Ro aktibidad hay ginpangunahan it pagmartsa it Philippine flag kaibahan ro mga department head it nagkaeain-eain nga ahensya it lokal nga gobyerno, kapulisan, militar, PCG, opisyal it barangay ag maabo nga iba pa.
Ro tema makaron nga dag-on para sa adlaw it kahilwayan hay “Kalayaan 2022 pagsuong sa hamon ng panibagong bukas”.
Raya hay may kaangtanan gihapon sa padayun nga pagsukoe it nasyon kontra sa COVID-19 pandemic.
Nagakadapat eamang sigon nga dumdumon ag taw-an it importansya ro bandera bangud nga ro gina-angkon natun nga kahilwayan makaron hay sangka regalo halin sa sakripisyo it mga baganihan nga naghaead it andang hueas ag dugo para sa nasyon.
Ro aktibidad hay nagtapos pinaagi sa pagpaeupad it 124 ka mga salampati nga nagasimbolo it kahilwayan it mga Filipino.
