KALIBO, Aklan—Nagplastar it hugut nga sueundanan ro lokal nga gobyerno it Kalibo para sa pagahiwaton nga virtual “Patik Battle of the Ati-Atihan Bands” nga kaparte it aktibidad sa nagahilapit nga Kalibo Sto. Niño Ati-atihan Festival 2022 nga pagahiwaton sa Magsaysay park.
Suno kay Mr. Terrence Toriano, Head it Municipal Disaster Risk Reduction and Management Office ukon MDRRMO-Kalibo nga raya hay bilang sabat sa padayun nga pagtinaas it kaso it COVID-19.
Suno kana nga hugut nanda nga igapatuman ro health and safety protocol bilang pag-dahan halin sa pagkalhit it deadly virus.
Kinahangean man sigon nga mag-presentar ro mga participants it vaccination card, ID ag dapat nga nakasuksok it face mask sa tanan nga oras.
Magabutang man sanda it floor markers sa guwa ag sueod it venue nga may 1.5 meters ro distansiya agud nga malikawan ro pag-ililiping.
Disqualified man ro miyembro it tribu nga mapamatud-an nga una sa impluwensiya it makahieilong nga aeak kamana man ro mga may sintomas it deadly virus.
Magataeana it one-entry-one-exit sa venue ag holding area sa parte it archbishop reyes st. ag owa it pagapasugtan nga audience mag-eowas sa mga katapo it media nga maga-cover it event.
Bawae man ro fireworks display ag mga unga nga naga-edad it 12 anyos panaba.
Nauna eon nga ginpaabot ni kalibo mayor emerson lachica nga ro andang mga ginpahaum nga mga events and activities hay nagahueat pa it ‘go signal’ halin sa national inter agency task force kapareho it ati-atihan bazaar, food festival ag iba pa.
Kapareho man nga guidelines ro igapatuman sa costume contest para sa mga pets nga aww-meow contest sa covered court it Pastrana Park.
Nasayuran nga sa ikaywang sunod nga dag-on, kanselado eon man ro tradisyunal nga sadsad ukon merry making ag ro prusisyon it mga deboto agud nga malikawan ro pagdagsa it mga tawo.
