Kalibo Aklan —- Kasunod it hingyu it mga Barangay Officials nga taw-an it ayuda ro mga Barangay Tanod nga nagabantay sa mga checkpoints, ginpakamayad ni Kalibo Mayor Emerson Lachica nga magpaguwa it pondo para kanda .
Suno kana nga ko nagtaliwan nga Abril 21 hay nagtaeana imaw it 1,500 pesos per day sa kada Barangay agud nga maging budget sa pagkaon it mga tanod.
Mabahoe suno kana ro andang papel bilang frontliners it mga Barangay, eabi eon sa presenteng emergency nga ginaexperiensiyahan it nasyon tuga it COVID-19.
Nasayuran nga mag-eowas sa mga garbage collector , kaibahan man ro mga tanod sa ginataw-an it hazard pay nga 500 pesos per duty nga nag-umpisa ko Abril 1 hasta 30 .
Sa pihak nga parte, gindugang pa ni Mayor Lachica nga kabilugan nga 21,966 packs it relief goods ro andang ginpanupod sa mga pumueuyu it banwa it Kalibo.
Makabig sigon raya nga second wave it bulig , kun sa siin , ro una nga gindistribute hay halin sa pondo it kada Barangay .
Ginbalita pa kara nga ro ikatlong wave it bulig nga igapanupod hay tig-500 pesos nga posibleng maitau sa sabado nga adlaw .
Sa makaron hay gin-abisuhan sigon nana ro mga Barangay Officials nga maghimo it listahan it mga households nga target beneficiaries agud nga maobrahan it payroll.
Posible man sigon nga igadungan kara ro pag-release it benepisyo para sa mga senior citizens ag Social Amelioration Program (SAP).
Ginpasiguro pa nana nga bastante pa ro andang pondo nga naga-abot sa 14 milyon pesos para sa naexperiensiyahan nga health crisis .
Samtang, magabutang sigon sanda it mas maabu nga lamesa agud nga mapatuman sa gihapon ro social distancing.
Mag-eowas kara, magapangayo man sanda it bulig sa mga law enforcement agencies para sa maayos nga pagbantay.
