KALIBO, Aklan—Nakaplastar eun ro mga plano it lokal nga gobyerno it Kalibo para sa nagahilapit nga selebrasyon it Kalibo Sr. Santo Niño Ati-atihan Festival 2021.
Suno kay Liga ng mga Barangay President ag Pook Punong Barangay Ronald Marte nga kahapon hay nagpatigayon eun it hinun-anon ro lokal nga gobyerno it banwa kaibahan ro mga katapo it Kalibo PNP sa pagpamuno ni P/Maj. Bellshazzar Villanoche, Municipal Tourism Office ag ro mismong organizer it nasambitan nga aktibidad.
Sambilog man sa mga gin-istoryahanan hay ro seguridad it mga magapartisipar sa pagahimuon nga shooting samtang nagabo-oe it video nga imaw man ro igapaguwa sa publiko pamaagi sa nagkaeain eain nga klase it social media.
Maghalin man sa 20 nga magapasakop hay gin-ubra eun lang rayang 16.
10 kara hay magasadsad ag ro nabilin nga an-om hay magabuyot it mga instrumento.
Dapat man nga mapabilin ro distansiya sa kada isaea it mga magapartisipar samtang naga-perform.
Ginatantiya nga may unang 30 ka mga tribu ro magapasakop ag magapasindayag sa nasamibtan nga aktibidad.
