KALIBO, Aklan—Nakataeana nga magpatawag it pueong ro lokal nga gobyerno it Kalibo sa mga miyembro it NAPOCACIA Small Farmers and Homeowners Association sa adlaw it Huwebes para maplastar ro mga impormasyon angot sa andang ginapangayo nga Resettlement Action Plan.
Suno kay Engr. Marlo Villanueva it Municipal Planning Development Office (MPDO) nga owa pa it ginpagguwa nga aksyon ro Department of Transportation (DOTr) angot kara.
Ginpasiguro ni Engr. Villanueva nga insigida nandang igapaidaeom sa approval engkaso nga matapos eon it DOTr ro mga nakitang kakueangan sa Resettlement Action Plan.
Sa kamatuoran suno kana, may napuna ro DOTr nga kinahang-ean pang mausisa ag estudyuhan antes isumite sa lokal nga gobyerno.
Owa eon sigon it maitao nga pondo ro taeatapan para makaron nga dag-on kamana man nga ginatinguhaan pa nga mausuyan it pondo para sa 2022.
Limitado eamang sigon ro magiging papel it LGU-Kalibo bangud owa pa it Memorandum of Agreement (MOA) nga kaparte it nasambit nga proyekto.
Matueopangdan nga haeos ap-at nga dag-on eon nga nagahueat ro mga miyembro it NAPOCACIA bangud hasta makaron hay maabo pa kanda ro owa nabayaran.
