KALIBO, Aklan—Padayon nga nagausoy it pamaagi ro lokal nga gobyerno it Kalibo agud nga makaangkon it “winwin solution” kaangot sa reklamo it vendors sa Kalibo public market kontra sa mga nagsoeputan nga talipapa sa mga kabaryuhan it banwa.
Suno kay Executive Assistant to the mayor Basil Tabernilla, ginatan-aw eon sigon makaron ro pila ka mga tikang nga posibleng himuon nga makata-o it solusyon sa reklamo it mga market vendors nga makabenipisyo ro tanan.
Ginpaathag nga igabalik gid man sa public market ro pagbinaligyaanay apang makaron hay medyo malisod pa raya nga ibalik bangud nga ginatan-aw nga mismong ro mga bumaeakae eon ro magareklamo.
Raya hay bangud sa pila ka mga rason kaparehas it mahae nga pamasahe ag inde pa makapabnwa ro mga naga-ead it 21 anyos panaba kamana man 60 anyos pataas.
Aminado si Tabernilla nga ginabatyag man it munisipyo ro epekto it pagsoeputan it mga talipapa bangud nga uwa it nagasueod nga revenue apang eubus raya nga makabenepisyo sa mga pumueoyo sa tunga it ginapangatubang nga pandemya.
Ginpahayag dugang nga ginatinguhaan eon makaron it munisipyo nga masolusyunan ro tanan bangud sa nakikita man nga risgo sa ikaayong eawas sa mga gintukod nga talipapa sa binit mga karsadahon.
