KALIBO, Aklan—Pagasuspendihon anay it lokal nga gobyerno it Kalibo ro pagpatuman it re-routing scheme.
Raya hay kasunod it mga reklamo nga nabaton it munisipyo halin sa mga pumueoyo nga apektado it nasambit nga tikang.
Suno kay Federation of Kalibo Tricycle Operators and Drivers Association Inc. ukon FOKTODAI president Mr. Johnny Damian nagpatigayun sigon it sangka pueong kahapon ro LGU-Kalibo sa pagpanguna ni Mayor Emerson Lachica.
Dikara sigon naistoryahan ro mga naging assessment it munisipyo ag mga drivers.
Aminado man si Damian nga kumita ro mga driver sa sueod it haeos limang adlaw nga dry run it re-routing scheme.
Naobserbahan man sigon ro paghaeuga it karsada ag nabuhinan ro problema sa trapiko.
Sa pihak it pilang manami nga resulta, indi man sigon malikawan ro kabudlay nga daea kara sa mga pumueoyo.
Naeubtan man sigon nanda ro sitwasyon it mga commuters bangud ro mga raya ro nagapas-an it problema.
Kinahang-ean suno kana nga balansehon ro sitwasyon para maging pabor raya sa parehong driver ag pumueoyo.
Sa nasambit nga pueong, ginpahayag ni Damian nga nagpabutyag si Mayor Lachica nga pagasuspedihon anay kara ro pagpatuman it re-routing scheme samtang may pandemya.
Engkaso sigon nga matapos eon ro problema sa pandemya hay dikara eon lang uman nga ipatuman ro ordinansa.
Gipahayag dugang nga nga ginarespito nanda ro desisyon it alkalde.
Sa makaron hay ginahueat lang nanda ro memorandum nga igapagguwa ni Mayor Lachica.
