KALIBO, Aklan—Bangud sa maeawig nga proseso sa pagbakae it eugta agud nga obrahon nga COVID burial grounds, plano it lokal nga gobyerno it Kalibo nga gamiton anay ro road ways ukon mga daean sa sementeryo nga paga-eubngan it mga namatay sa COVID 19.
Suno kay Pook Barangay Captain ag liga ng mga barangay president Kalibo chapter Ronald Marte nga pwede man ro suhestiyon apang kinahangean nga masiguro it mga natungdan nga indi makahalit sa publiko.
Mas mayad suno kana kon maka-usoy it ibang lugar bangud nga masyado eon nga gutok ro mga sementeryo sa Kalibo.
Nasayuran nga sa ginpatigayon nga special session it Sangguniang Bayan it Kalibo ko nagtaliwan nga adlaw, gin-aprubahan ro hinyo ni mayor emerson lachica nga mataw-an imaw it otoridad agud nga magbakae it eugta para sa mga namatay nga covid victim.
Apang suno kay marte nga ro problema kara makaron hay ro kakueangan it pondo.
Engkaso suno kana nga maka-usoy it eugta hay dapat nga maghimo eagi it kutkot nga 6 feet ro kadaeumon ag sementuhon ro palibot agud nga indi masueod it tubi.
Samtang, ginsuhestiyon man kara nga obrahon nga crematorium ro motorpool it kalibo bangud nga maeapit man raya sa sementeryo.
Nagakinahangean suno kana it insigidang aksyon ro problema bilang preparasyon sa “worst case scenario”.
Kada adlaw sigon hay ginasugid nga may taga kalibo nga nagakamatay sa COVID nga naga-average sa sambilog hasta tatlo.
