KALIBO, Aklan—Ginproponer ni Kalibo Sangguniang Bayan member Augusto Tolentino ro pagpatigayun it house-to-house vaccination sa mga kabarangan agud nga mapadasig ro vaccination program it gobyerno.
Haeos tanan nga miyembro it Sangguniang Bayan hay nagpabor man sa proposisyon ni Tolentino bangud nagapati sanda nga mabahoe ro maibulig kara sa pagsukoe it banwa sa pandemya.
Sa rayang pamaagi suno kana hay mataw-an it kahigayunan ro mga senior citizen, bedridden ag Person with Disabilities nga indi eon magastos it pamasahe sa pagbiyahe para magpaturok it bakuna.
Ginpasiguro man it Municipal Health Office (MHO)-Kalibo nga naistoryahan eon nanda ro pagpatigayun it house-to-house vaccination apang ro focus sigon nanda sa makaron hay ro pediatric population bangud maisot nga porsyento pa eamang it mga pamatan-on ro nabakunahan.
