KALIBO, Aklan—Sigidas makaron ro pagpanupod it lokal nga gobyerno it Kalibo it relief goods para sa purok 1 hasta 6 it C laserna St. Kalibo nga presente sa gihapon nga naka-granular lockdown bangud sa nailistang COVID-19 positive cases sa nasambit nga lugar.
Suno kay Municipal Social Welfare and Development Office ukon MSWDO Kalibo officer Lolly Espino nga kapin eon sa 550 nga relief packs ro andang natigayon nga ma-distribute sa mga apektadong pamilya.
Gindugang pa kara nga daywang beses man sanda nga nakapanupod it ayuda sa mga residente it sitio libuton b ag sitio ilaya sa brgy. bakhaw norte kalibo matapos man nga ginpaidaeum sa lockdown ro andang lugar.
Mabahoe man sigon ro andang pagpasaeamat bangud nga puro nag-negatibo ro resulta it mga pumueuyu nga ginpaidaeum sa swab test nga nakaangkon it direct contact sa nagpositibo sa sakit sa sitio libuton B rason nga gin-bawi eon kahapon ro lockdown.
Madumduman nga sangka laboratory encoder it molecular laboratory nga nahamtang sa aklan provincial hospital nga residente it nasambit nga barangay ro unang nagpositibo sa sakit nga nagresulta sa pag-angkon it local transmission kat matapnan kara ro iba pa nana nga mga ka-trabaho.
Gindugang pa ni Espino nga insigida man nanda nga gin-aksyunan ro request ni barangay captain nelson repiedad nga mataw-an it ayuda ro mga naka-isolate nga apektadong paamilya nga nakasalamuha it pasyenteng covid 19 positive nga naga istar sa sitio tampogaling, brgy linabuan norte kalibo kamana man sa brgy. old buswang kalibo.
Ro brgy. estancia sigon nga nakalista man it kaso ag gin-surgical lockdown ro pilang lugar hay ginsabat anay it barangay council ro ayuda bangud nga may bastante pa sanda nga pondo.
Ro food packs hay ginaeakipan it limang kilong bugas, 6 nga nagkaeain-eain nga delata, kape, noodles, pancit canton ag iba pa nga nagabalor it ginatantiya nga 450 pesos.
Samtang, ginpadumdum ni Espino ro tanan nga pumueuyu nga kon pwede hay magpabilin sa sueod it baeay ag mag-disinfect it maayos agud nga masuk-ean ro makamaeatay nga sakit.
