KALIBO, Aklan—Uman nga nagpanindugan si Kalibo Mayor Emerson Lachica nga indi magapatuman it ‘No Movement Sunday’ sa banwa it Kalibo.
Raya hay sa tunga it rekomendasyon it Sangguniang Bayan it Kalibo bangud sa nagatinaas nga kaso it Coronavirus.
Suno kana nga bilang sentro nga banwa hay owa imaw naila nga maapektuhan ro ekonomiya bangud nga owa it magiging kita ro mga vendors ag maskin ro transportasyon.
Para kana, epektibo ro paglimita sa pagpasueod it mga pumueuyu, kun sa siin kada adlaw hay 15 eamang nga travel pass ro ginabaton kada banwa eabi pa ag gin-extend ro pagpatuman it Modifiend Enhanced Community Quarantine (MECQ) sa Aklan hasta sa Agosto 31, 2021.
Kinahangean suno kana nga mabalanse ro epekto it pandemic sa ekonomiya ag ikamayad nga eawas.
Uman nga nagpanawagan ro alkalde it kooperasyon ag sundon ro mga minimum health protocols eabi pa ag nasayuran eon it tanan ro peligro nga daea it nasambit nga deadly virus.
