KALIBO, Aklan—Nagpahaum eon ro lokal nga gobyerno it Libacao it burial grounds kun siin iga-eubong ro mga COVID-19 victim.
Raya hay matapos it naging pueong ni Aklan Governor Florencio Miraflores sa 17 ka mga alkalde it probinsya bangud sa temporaryong pagpundo it operasyon it partner crematorium facility sa siyudad it Iloilo umpisa ko Agosto 2, bangud sa kaabo it mga ginadaea nga bangkay idto kada adlaw.
Bilang pagsunod sa protocol, kinahang-ean nga mai-eubong ro bangkay sa sueod it 12 oras matapos nga bawian it kabuhi.//Ro kutkot hay dapat nga may daeom nga 6 feet ag dapat nga nakabutang ro bangkay sa selyadong metal casket.
Suno kay Libacao Mayor Charito Navarrosa, ko nagtaliwan pa nga dag-on nanda gin-umpisahan ro proyekto bilang pagpahaum sa ginaeauman nga “worst case scenario” tuga it pandemya.
Ginabuebanta nga naga-abot sa 40 ro kapasidad it andang gintaeana ng burial grounds para sa mga pasyenteng namatay sa COVID-19 sa Public Cemetery it Libacao.
Mag-eowas kara, plano man it LGU nga magtukod it dugang nga isolation center ag evacuation center matapos ro ginpatigayun nga bidding sa idaeom it P60 million nga pondo.
