KALIBO, Aklan–Sigidas eon ro ginahimo nga pagpahaum it lokal nga gobyerno it Makato sa tunga it nagahilapit nga Western Visayas Regional Athletic Association (WVRAA) Meet 2023 nga pagahiwaton sa probinsya it Aklan umpisa Abril 24 hasta 28.
Suno kay Mayor Ramon Anselmo Martin Legazpi III nga nagapadayun ro andang pueong kaibahan ro Makato PNP, Bureau of Fire Protection (BFP), Municipal Disaster Risk Reduction and Management Council ag Rural Health Unit (RHU) agud nga maplastar it maayos ro igapatuman nga seguridad.
Plano man sigon nanda nga magbutang it welcome arch para sa mga delegado.
Sa makaron hay sigidas ro pagtinguha it LGU para sa beautification ag security measures para masiguro nga maayos ag euwas ro pagtinir it mga bisita.
Ginpahayag dugang nga nagahueat sanda it koordinasyon halin sa gobyerno probinsyal engkaso nga magkinahang-ean sanda it bulig sa pagprepara it Calangcang Sports Complex.
Nagaeaum man ro alkalde nga may igapadaea nga augmentation it mga kapulisan agud nga maging bastante ro pagtao it seguridad ag maipatuman ro hugut nga pagbantay sa kabilugan it pahampang.
Ginatantya nga naga-abot sa 3,000 ka mga student athlete ag delegado ro maga-abot halin sa nagkaeain-eain nga probinsya it Western Visayas.
