KALIBO, Aklan—Ginklaro it lokal nga gobyerno it Malay nga aware sanda nga may mga sinkholes nga nadiskubrehan sa isla it Boracay kasunod sa ginpatigayon nga survey ag hazzard mapping it Mines and Geosciences Bureau (MGB) it Department of Environment and Natural Resources (DENR) nga gin-umpisahan kato pang 2018 sa kasagsagan it temporaryong pagpasarado sa isla ni dating Pangueong Rodrigo Duterte.
Apang, suno kay Malay sangguniang bayan member Alan Palma Sr. nga kinahang-ean nanda ro scientific explaination maghalin sa MGB para makahimo sanda it mga tikang ag rekomendasyon sa sangguniang bayan para sa kamaeayran it tanan.
Ginakabig nga world premiere tourist destination ro isla it Boracay kon sa siin posibleng makaapekto sa sektor it turismo ro ginpaguwang datos it MGB.
Angot kara, ginapanugyan nanda nga makipag-angot ro MGB sa LGU para sa mga pagahimuon nga mitigating measures para masayuran kon sa mga nadiskubrehan nga sinkholes hay kon may nakatindog eon nga istraktura ukon uwa kamana man kon man-uno raya kadelikado.
Nauna eon nga nagpaguwa ro MGB it report nga kapin eon sa 815 sinkholes ro andang nadiskubrehan nga konektado sa mga identified wetland sa isla it Boracay.
