KALIBO, Aklan—Uman nga gin-insister ni Malay mayor Frolibar Bautista sa Boracay Inter-Agency Task Force nga limitahan ro pagsueod-guwa it mga tourism workers sa isla agud nga malikawan ro mas pang pagkalhit it covid-19.
Suno kana nga makaron hay ro required eamang sa mga trabahador agud nga makabalik sa andang ginatrabahuhan nga mga resorts, hotels ag iba pang mga establisimento hay ro rapid antigen test eamang ag bukon it RT-PCR tests.
Madumduman nga ko disyembre it nagtaliwan nga dag-on hay gin-umpisahan ro libreng COVID-19 RT-PCR tests sa tanan nga mga nagtatrabaho sa Boracay agud nga masiguro ro ikamayad nga eawas kamana man ro kaeowasan it mga turistang andang makasalamuha.
Apela ni mayor Bautista nga likawan anay nga magguwa it isla kon owa man lang it importanteng transaksyon sa mainland.
