KALIBO, Aklan – – – Bangud sa palpak ag mahinay nga construction it drainage system sa isla it Boracay, gin proponer ni Malay Mayor Ceciron Cawaling nga itugyan eon lang sa LGU-Malay ro pagdumaea sa proyekto agud hugot nga ma-monitor raya.
Suno sa alkalde, inabot eon it siyam-siyam ro nasambitang proyekto it Tourism Infrastructure and Enterprise Zone Authority (TIEZA) nga hasta sa makaron hay owa sa gihapon natapos.
Nagapati imaw nga kun gingamit eamang sa ensakto ro pondo hay owa eon konta nag abot sa makarondaya ro problema sa isla.
Gin puna man kara ro Boracay Island Water Company (BIWC) bangud sa posibling kueang sigon ro andang linya rason nga naga busawak eon lang ro andang tubo maghalin sa Sewage Treatment Plant (STP) bisan nga owa naga uean.
Gin suhestiyon ni Cawaling nga dugangan ro andang STP agud maka-recover ro bilog nga isla kamana man agud nga maglimpiyo ro waste disposal.
Gin hayag kara nga ro problema sa makaron sa isla hay gin mana pa kara sa nagtaliwan nga administrasyon.
Samtang, nagapati man si Cawaling nga masolusyonan ro problema sa Boracay engkaso nga naga bueoligan ro tanan nga ahensiya.
Likawan sigon ro pagkanya-kanya agud makabilog it konkretong solusyon sa environmental problems nga gina pangatubang it isla.
Samtang, gin banatan man ni Cawaling ro daywang ka mga higanteng television network sa nasyun bangud sa mga lumang litrato ukon recycled photos nga gin eakip sa artikulo kun siin gina pakita nga ro isla hay napalibutan it green algae ukon mga eumot.
Gin eksplikar dugang kara nga ro eumot hay seasonal eamang ag nagatuhaw kada tiempo it summer.
