KALIBO, Aklan—Nagaeaum ro Bureau of Fire Protection ukon (BFP-Malay) nga pagadugangan pa it lokal nga gobyerno it Malay ro mga fire truck agud nga mas pang maserbisyuhan ro komunidad ag mga bumbero nga nagaresponde sa mga insidente it sunog.
Suno kay Malay Municipal Fire Marshall Senior Inspector Arnold Dimaano nga nagakinahangean ro banwa eabi eon ro isla it boracay it mga brand new nga fire truck ag saeakyan agud nga makabulig sa mga bumbero nga insigidang makaresponde ag makaeowas sa mga residente eabi eon ro mga nagakinahangean nga i-rescue halin sa mga mataas nga building.
Sa makaron ro BFP Malay hay may tatlong fire trucks ag 27 nga tawuhan sa mainland Malay ag isla it Boracay.
Daywa sa mga raya hay naka-station sa BFP Boracay substation sa Sitio Bantud sa Barangay Manocmanoc.
Suno kana nga importante man nga mag invest ro LGU sa pagtatap sa kaeowasan it publiko mag-eowas sa ginatutukan nga seguridad.
Ginpahayag dugang nga mag-eowas sa pagtapna sa kaeayo, ro mga bumbero hay naga-responde man sa mga nagakinahangean it atensyong medikal ag pag transport sa mga pasyente.
Kamana man ro pagpatigayon it fire inspection, drills ag lectures.
Uman nga nataeupangdan ro problema matapos nga nagtuhaw ko nagtaliwan nga Hunyo 21 ro sangka sunog sa sangka construction warehouse sa Sitio Cagban sa Barangay Manocmanoc kun sa siin ginaboebanta nga P21 million ro napabalitang kahalitan nga gintuga.
Naging mabudlay sigon ro andang operasyon matapos nga nakaangkon it problema ro iba nanda nga fire truck tuga it mabuhay nga fire fighting operation.
Nasayuran nga pila sa mga fire truck sa lugar hay haeos 30 anyos eon ro edad kun sa siin ro sambilog nga naghalin sa sangka banwa sa aklan hay gin-ayos eamang agud nga mag itsurang bag-o.
