KALIBO, Aklan—Gin-abisuhan it lokal nga gobyerno it Malay ro andang mga pumueoyo nga likawang iselebrar ro kapyestahan ni San Juan de Bautista sa baybayon ag mga kasubaan sa maabot nga Hunyo 24, adlaw it Huwebes.
Ro nasambit nga abiso hay agud nga malikawan ro pag-eapnaag it deadly virus nga covid-19 sa banwa bangud nga ginapatihan nga local gatherings ro ginakabig nga rason kon ham-an it nagatinaas ro kaso it makataeapon nga sakit.
Hugot nga ginabawae it lokal nga gobyerno ro pagtipon-tipon sandig eon man sa mandato it National Inter Agency Task Force on Covid-19 kon sa siin aktibong ro publiko pag-abot sa makarundaya nga selebrasyon nga nakasanayan eon it mga Filipino kada dag-on.
May kaangtanan kara, nagpangayo it pasaylo ro LGU sa mga pumueoyo kadungan sa pag-apela nga magsunod sa ginapatuman nga sueondanan partikular nga una sa idaeom it modified general community quarantine with heightened restriction ro bilog nga probinsya it Aklan.
